Prolonged Grief Disorder പുതിയ രോഗം. DSM 5 TR പുറത്തിറങ്ങി.

മാനസിക രോഗങ്ങളുടെ ലക്ഷണങ്ങളും പ്രത്യേകതകളും വിശദീകരിക്കാനും മാനദണ്ഡങ്ങൾ നിശ്ചയിക്കാനും അമേരിക്കൻ സൈക്യാട്രിക്ക് അസോസിയേഷൻ പ്രസിദ്ധീകരിക്കുന്ന Diagnostic and Statistical Manual of Mental Disorders (DSM) പുതിയ പതിപ്പായ DSM 5 TR 2022 മാർച്ചിൽ പുറത്തിറങ്ങി. അടുപ്പമുള്ളവരുടെ മരണത്തോട് പൊരുത്തപ്പെടാൻ കഴിയാത്ത അവസ്ഥയായ Prolonged Grief Disorder (PGD), Trauma and Related Stressors എന്ന വിഭാഗത്തിൽ ഒരു പുതിയ diagnosis ആയി ഇതിൽ ഉൾപ്പെടുന്നു. 

2022 ജനുവരിയിൽ നിലവിൽ വന്ന WHO-യുടെ International Classification of Diseases പതിനൊന്നാം പതിപ്പിലും (ICD-11) PGD ഉൾപ്പെടുത്തിയിട്ടുണ്ട്. മരണത്തെ തുടർന്നുള്ള ദു:ഖം (Grief), വിലാപം/ദുഃഖാചരണം (Mourning) തുടങ്ങിയവയിൽ ഓരോ സമൂഹത്തിലെയും സംസ്കാരത്തിന് കാര്യമായ സ്വാധീനം ഉണ്ടെന്നത് ഇത്തരമൊരു രോഗത്തിന്റെ നിർണയത്തിൽ പരിഗണിക്കേണ്ട ഒരു ഘടകം ആയേക്കാം. വേണ്ടപ്പെട്ട ഒരാളുടെ മരണത്തെ തുടർന്ന് പെട്ടെന്നുള്ള പ്രതികരണവും അതിന്റെ രൂക്ഷതയും (initial reactions) ഇന്റ്യ ഉൾപ്പെടുന്ന കിഴക്കൻ രാജ്യങ്ങളിൽ കൂടുതൽ ശക്തമായിരിക്കുകയും എന്നാൽ ഇവിടത്തുകാർ മരണം ഏൽപ്പിക്കുന്ന ആഘാതത്തിൽനിന്ന് വേഗം കരകയറുകയും ചെയ്യുന്നു. മറിച്ച് പടിഞ്ഞാറ് ഉള്ളവരുടെ ആദ്യ പ്രതികരണങ്ങൾ അത്ര കടുത്തതാവില്ലെങ്കിലും അവർക്ക് ഒരു മരണത്തിന്റെ ഷോക്കിൽ നിന്ന് മുക്തരാവാൻ കൂടുതൽ സമയം വേണ്ടി വരുന്നു എന്നാണ് പഠനങ്ങൾ പറയുന്നത്.

മറ്റു മാറ്റങ്ങൾ:

ആത്മഹത്യാപരമായ പെരുമാറ്റം (suicidal behavior), ആത്മഹത്യാപരമല്ലാത്ത സ്വയം പീഡ (nonsuicidal self-injury - NSSI) എന്നിവ ഒരു രോഗത്തിന്റെ ഭാഗമല്ലാതെ തന്നെ പ്രത്യേക ശ്രദ്ധ കൊടുക്കാവുന്ന പ്രശ്നങ്ങളായി അംഗീകരിക്കുന്നു.

ആദ്യം Mental Retardation എന്നും പിന്നീട് Intellectual Disability എന്നും വിളിച്ചിരുന്ന അവസ്ഥകളെ Intellectual Developmental Disorder എന്ന് പേര് മാറ്റിയിട്ടുണ്ട്. അതുപോലെ നേരത്തെ ഉണ്ടായിരുന്ന Conversion Disorder എന്ന രോഗത്തിന്റെ പേര് Functional Neurological Symptom Disorder എന്നും ആയിട്ടുണ്ട്.

Cisgender എന്ന പദം ഉൾപ്പെടുത്തുകയും അതിന് നിർവചനം കൊടുക്കുകയും ചെയ്തിരിക്കുന്നു. “Desired gender” എന്ന പഴയ പ്രയോഗം “Experienced gender” എന്നും “Cross-sex medical procedure” എന്നത് മാറ്റി “Gender-affirming medical procedure” എന്നും ആക്കിയിട്ടുണ്ട്. അതുപോലെ “natal male”/“natal female” എന്നത് “individual assigned male/female at birth" എന്നും മാറ്റി.

വംശീയത (racism), വിവേചനം (discrimination) തുടങ്ങിയവ മൂലം ഉണ്ടാകുന്ന ദോഷങ്ങളെ പരിഗണിക്കാനായി DSM-ൽ ഉപയോഗിച്ചിരിക്കുന്ന ഭാഷ പൂർണ്ണമായും പരിഷ്കരിച്ചിട്ടുണ്ട്. ഒപ്പം ഓട്ടിസം സ്പെക്ട്രം രോഗങ്ങൾ, ബൈപോളാർ ഡിസോർഡർ, മേജർ ഡിപ്രഷൻ തുടങ്ങിയ രോഗങ്ങളുടെ മാനദണ്ഡങ്ങളിൽ ചെറിയ മാറ്റങ്ങളും പുതിയ DSM പതിപ്പിൽ വന്നിട്ടുണ്ട്.
#PsychologyWeek


 

നമ്മളെങ്ങനെയാണ് നേതാക്കളെ തെരഞ്ഞെടുക്കുന്നത്?

 നമ്മളെങ്ങനെയാണ് നേതാക്കളെ തെരഞ്ഞെടുക്കുന്നത്?
അല്ലെങ്കിൽ ആളുകൾ എങ്ങനെയാണ് നേതാക്കളും തീരുമാനമെടുക്കുന്നവരും സ്വാധീനം ചെലുത്തുന്നവരും (influencers) ഒക്കെ ആവുന്നത്?

നേതൃ സ്ഥാനങ്ങളിൽ (രാഷ്ട്രീയത്തിലും, മതത്തിലും, കോർപ്പറേറ്റ് ലോകത്തും, കലാരംഗത്തും ഒക്കെ) എത്തുന്ന മനുഷ്യർ പലരും ആ പണിക്ക് കൊള്ളാത്തവരാവും, എന്നു മാത്രമല്ല ചിലരെങ്കിലും കാര്യങ്ങൾ അടിമുടി നാശമാക്കുകയും ചെയ്യാറുണ്ട്. രാഷ്ട്രീയ നേതൃത്വത്തിലും മറ്റും എത്തിപ്പെടുന്ന ഇത്തരക്കാർ ചെയ്യുന്ന ദ്രോഹം തലമുറകളോളം നിലനിൽക്കുകയും ചെയ്യാം.

ആളുകളുടെ നേതൃപാടവം (മറ്റ് കഴിവുകളും) വിലയിരുത്തുന്നതിൽ നമുക്ക് പൊതുവെ ചില പിഴവുകൾ സംഭവിക്കാറുണ്ട്. ഒന്ന് ആത്മവിശ്വാസത്തെ (confidence) കഴിവായി (competence) തെറ്റിദ്ധരിക്കുന്നതാണ്. പക്ഷേ ഇവ രണ്ടും തമ്മിൽ അത്തരമൊരു ബന്ധം ഇല്ലെന്നാണ് തെളിവുകൾ പറയുന്നത്. ചിലപ്പോഴൊക്കെ അമിത ആത്മവിശ്വാസം കഴിവില്ലായ്മയ്ക്കും ആത്മാരാധനയ്ക്കും (narcissism) ഒക്കെയുള്ള മറയും ആയിരിക്കും.

വ്യക്തിപ്രഭാവം അഥവാ കരിസ്മയോടുള്ള നമ്മുടെ പ്രതിപത്തിയാണ് മറ്റൊരു കെണി. നല്ല നേതാക്കൾ ഈ so-called കരിസ്മ ഉള്ളവരാവണം എന്ന പൊതുബോധം മാസ് മീഡിയുടെയും ഇന്റർനെറ്റ്/സോഷ്യൽ മീഡിയയുടെയും വളർച്ചയോടെ വളരെ ശക്തമായിട്ടുണ്ട്. വ്യക്തിപ്രഭാവത്തിന്റ മറ ഉപയോഗിച്ച് 'നിർമ്മിച്ചെടുത്ത' നേതാക്കൾ എത്രമാത്രം ദോഷം ചെയ്യാം എന്നത് നാം നേരിട്ടറിഞ്ഞു വരികയാണല്ലോ. ഇത്തരം ഷോമാൻമാരെ അപേക്ഷിച്ച് നല്ല നേതൃപാടവമുള്ള മനുഷ്യർ പലപ്പോഴും പ്രകടനപരത തീരെ കുറവുള്ളവരാവും. നമുക്ക് കണ്ടിരിക്കാൻ പറ്റുന്ന ഒന്നും അവർക്ക് തരാനുണ്ടാവണമെന്നില്ല.

ആത്മാരാധന (Narcissism) ഉള്ളവർക്ക് മറ്റുള്ളവരുടെ അംഗീകാരം (ആരാധനയും) വേഗത്തിൽ പിടിച്ചു പറ്റാനുള്ള കഴിവും ഇതേപോലെ മറ്റൊരു കെണിയാണ്. നാർസിസ്സിറ്റുകൾക്ക് മറ്റുള്ളവരുടെ മേലുള്ള ഈ സ്വാധീനം ഒരുപാടു കാലം നിലനിൽക്കില്ലെങ്കിലും അവർക്ക് വേണ്ട കാര്യങ്ങൾ അവർ വേഗം തന്നെ നേടിയിട്ടുണ്ടാവും. മറ്റുള്ളവരെ ചവിട്ടിമെതിച്ചും ഇല്ലാതാക്കിയും ഏതെങ്കിലുമൊക്കെ സ്ഥാനങ്ങളിൽ എത്തുന്ന ഇവർ പലപ്പോഴും വിനാശകാരികളായി മാറും. അപ്പോഴും അവരെ പുകഴ്ത്താൻ നമ്മളിൽ പലരും ഉണ്ടാവുകയും ചെയ്യും. "എത്ര കൊള്ളരുതാത്തവൻ ആയാലെന്താ, അയാൾ ഇത്രയുമൊക്കെ എത്തിയില്ലേ" എന്നൊക്കെ നമ്മൾ ന്യായീകരിക്കുകയും ചെയ്യും.

എന്താണ് നാം ശരിക്കും ചെയ്യേണ്ടത്?

വ്യക്തിപ്രഭാവത്തിനും സൗന്ദര്യത്തിനും വാക്ചാതുരിക്കും ഒക്കെ മുകളിൽ നിൽക്കുന്ന ചില ഗുണങ്ങൾ (ആത്മാർത്ഥത, ബൗദ്ധിക വിനയം (intellectual humility), വൈകാരിക അച്ചടക്കം (emotion regulation) തുടങ്ങിയവ) ഉള്ള ആളുകളെ വിശ്വാസത്തിലെടുത്ത് ഉത്തരവാദിത്തങ്ങൾ ഏൽപ്പിക്കുന്ന ശീലം ഉണ്ടാക്കുക എന്നതാണ് ഒരു പ്രധാന കാര്യം.

ആളുകളെ വിലയിരുത്തുമ്പോൾ സഹജവാസനകൾക്ക് (instincts/hunches) പ്രാധാന്യം കൊടുക്കാതിരിക്കുക എന്നതും പ്രധാനമാണ്. യുക്തിസഹമെന്ന് നമുക്കു തോന്നുന്ന പല തീരുമാനങ്ങളും ചിന്താവൈകല്യങ്ങളുടെ (Cognitive Biases) സൃഷ്ടിയാവാം എന്നത് എപ്പോഴും ഓർക്കുക.

പിന്നെ പ്രധാനപ്പെട്ട തീരുമാനങ്ങൾ ഒക്കെ എടുക്കുമ്പോൾ വേണമെങ്കിൽ ഒരു കൺസൾട്ടിങ്ങ് സൈക്കോളജിസ്റ്റിന്റെ സേവനം തേടാവുന്നതാണ് 😊😊😊